ബുധനാഴ്ച ഇന്ത്യന് ഓഹരി വിപണി നഷ്ടത്തോടെ വ്യാപാരം ആരംഭിച്ചു. മിഡില് ഈസ്റ്റ് സംഘര്ഷം രൂക്ഷമായതിനെ തുടര്ന്ന് ക്രൂഡ് ഓയില് വില ബാരലിന് 92 ഡോളറിന് മുകളിലെത്തിയത് വിപണിയില് ആശങ്ക വര്ധിപ്പിച്ചു.
സെന്സെക്സ് ഒരു ഘട്ടത്തില് 600 പോയിന്റിലേറെ ഇടിഞ്ഞ് 76,861 വരെ താഴ്ന്നു. നിഫ്റ്റി 50 150 പോയിന്റിലേറെ നഷ്ടപ്പെട്ട് 24,050ല് താഴെ വ്യാപാരം നടത്തി.
അമേരിക്കന് പ്രസിഡന്റ് ഡൊണാള്ഡ് ട്രംപ് ഇറക്കുമതി ചെയ്യുന്ന ജനറിക് മരുന്നുകള്ക്ക് ഘട്ടംഘട്ടമായി തീരുവ ഏര്പ്പെടുത്തുമെന്ന് പ്രഖ്യാപിച്ചതിനെ തുടര്ന്ന് ഫാര്മ ഓഹരികള്ക്ക് ശക്തമായ തിരിച്ചടി നേരിട്ടു. പുതിയ ടാരിഫ് പൂര്ണമായി പ്രാബല്യത്തില് വരുന്നതിന് മുമ്പ് മരുന്ന് നിര്മ്മാതാക്കള്ക്ക് രണ്ട് വര്ഷത്തെ ഇളവ് അനുവദിച്ചിട്ടുണ്ട്.
മുന് ദിവസങ്ങളില് മികച്ച പ്രകടനം കാഴ്ചവെച്ചിരുന്ന സ്മോള്ക്യാപ്, മിഡ്ക്യാപ് സൂചികകളും ഇന്ന് നഷ്ടത്തിലായി. നിഫ്റ്റി സ്മോള്ക്യാപ് 100ഉം നിഫ്റ്റി മിഡ്ക്യാപ് 100ഉം 0.5% വരെ താഴ്ന്നു. ഇന്ഡിഗോയും സണ് ഫാര്മയും 23% വരെ ഇടിഞ്ഞ് സെന്സെക്സിലെ പ്രധാന നഷ്ട ഓഹരികളായി. ടെക് മഹീന്ദ്ര, ഇന്ഫോസിസ് എന്നിവയ്ക്ക് 1%ത്തിലേറെ നഷ്ടമായി. എസ്ബിഐ, എച്ച്ഡിഎഫ്സി ബാങ്ക്, ഐസിഐസിഐ ബാങ്ക്, ആക്സിസ് ബാങ്ക്, ടിസിഎസ്, എച്ച്സിഎല് ടെക്, കൊട്ടക് മഹീന്ദ്ര ബാങ്ക് എന്നിവയും ഏകദേശം 1% വീതം താഴ്ന്നു.
അതേസമയം മാരുതി സുസുക്കി, ടൈറ്റന്, ഹിന്ദുസ്ഥാന് യൂണിലീവര്, ഏഷ്യന് പെയിന്റ്സ്, എറ്റേണല്, എം ആന്ഡ് എം, ബജാജ് ഫിനാന്സ് എന്നീ ഓഹരികള് നേരിയ നേട്ടത്തില് വ്യാപാരം നടത്തി.
വിപണിയിലെ ചാഞ്ചാട്ടം അളക്കുന്ന ഇന്ത്യ വിക്സ് 3% ഉയര്ന്ന് 12.98 ആയി. നിഫ്റ്റി ഫാര്മ സൂചിക 1%ത്തിലേറെ ഇടിഞ്ഞു. എന്എസ്ഇയില് 1,496 ഓഹരികള് നഷ്ടത്തിലും 906 ഓഹരികള് നേട്ടത്തിലുമായിരുന്നു, 102 ഓഹരികളില് മാറ്റമുണ്ടായില്ല.
Content Highlights: Indian stock markets tumbled as escalating Middle East tensions pushed crude oil prices above $92 per barrel, dragging the Sensex down over 600 points and the Nifty below 24,050, while pharma stocks came under pressure following Donald Trump's new tariff plan on imported generic medicines